黃碧雲了解國家靠睇劇? 譚志源勸多到內地考察

  內地早前熱播嘅電視連續劇《人民的名義》,以反貪腐為題材,不但內地網民熱議,香港政界人士都捧場煲劇。其中,民主黨立法會議員黃碧雲尋日喺立法會大會上發言時就話,最近有好多人向佢介紹《人民的名義》,自己已經睇到第九集,仲話自己透過套劇,多咗了解內地官場文化添。

  政制及內地事務局局長譚志源回應黃碧雲話,自己都有睇《人民的名義》,仲已經睇到第16集,“(全劇)有五十幾集,仲有排先睇完。呢套幾好睇,我提議黃議員儘量睇完佢。”

  不過,睇劇還睇劇,譚局長都建議黃碧雲,唔好純粹靠睇劇嚟認識國家,希望佢同佢嘅黨友,應該多啲到內地考察、溝通,相信對了解國情會更有幫助。

責任編輯:大公網