龍城水戰泰瘋狂 地產舖唔賣樓賣水槍\鄭晴

  圖:市民隨手拎起“重型武器”水桶進行攻擊 \大公報記者林良堅攝

  泰國新年臨近,鄭晴尋日就喺有“小泰國”之稱嘅九龍城,親身經歷咗一年一度嘅盛事“潑水節”。晏晝啱啱過,數百人帶齊“武器裝備”,喺城南道嘅“主戰場”集結開戰。沿街嘅舖頭,不少老闆放低生意,加入“混戰”,“手無寸鐵”嘅攝影記者就成為大家“偷襲”嘅首要對象!水槍熱賣,連地產舖都“唔賣樓”一日,改賣水槍,按唔同“火力”每把售價由10蚊到50蚊不等。

  話説正式嘅“潑水節”習俗歷時數日,當地人清早起身就沐浴禮佛,之後就開始連續幾日嘅慶祝活動,呢段時間,大家用純淨嘅清水互相潑灑,祈求洗去過去一年嘅唔順景,新嘅一年重新出發咁話。“潑水節”首兩日系去舊,最後一日就係迎新。鄭晴我就唔使去咁遠,喺“小泰國”九龍城一日內就可以送舊迎新,真系“泰”方便喇!

  城南道嘅“Lemon Shop”老闆娘魏女士話,尋日生意同往日沒乜唔同,但節日最重要系開心,隨即拎起“重型武器”水桶,趁攝影記者同路人圍觀影相間隙,靜雞雞由背後“偷襲”,然後更直接拎起水管向路人“掃射”,隨即迎來多人“圍攻反擊”。情迷泰國文化嘅港人曾小姐就話,尋日適逢系佢生日,所以約埋朋友嚟“潑水節”慶生,雖然帶齊“裝備”,着埋雨褸,但都預咗會濕身。

  10年前由泰國移民來港嘅陳女士,尋日同一眾朋友喺街邊隨住音樂起舞,又不停向每個路人面部撲麵粉。佢話,撲粉系泰國新年嘅傳統習俗,代表美好嘅祝願,長輩向晚輩面度撲粉,就好似中國過年長輩向晚輩派利是,都系祝福嚟㗎。

責任編輯: 大公網

熱聞

  • 圖片

大公出品

大公視覺

大公熱度